كارثة الليغا الاسبانية

ليش الليغا رايحة للهاوية وكل أنديتها دتعاني ماديا عدا ناديين؟
برشلونة الحققت ثلاثية محلية ووصلت لنصف نهائي الأبطال ودتحقق 300+ مليون ربح متكدر تسجل لاعبيها بأريحية ، خيتافي بأول جولتين كل لاعبيها يشوفون المباراة من المدرجات حتى مو من الدكة لأن ما مسجلين ولاعب منهم يودعهم بالدموع لأن الرئيس مضطر يبيعه حتى يسجل غيره ، اشبيلية تبيعلها 3 لاعبين حتى تسجل فارغاس وبالنهاية تبيعه لفياريال ومع هذا تلكة نفسها تحتاج بيع 3 لاعبين أو 4 حتى تطلع من قاعدة ¼ ، فياريال نفسها تبيع أحد نجومها باينا لكريستال بالاس بمبلغ 30 مليون فقط حتى تسجل صفقة فيغا ب24 مليون وكم لاعب ثاني سعره ميتجاوز ال10 ملايين
ليش قبل يومين من بداية الدوري اكو 400 لاعب ما مسجل بالليغا؟ هسة اسولفلك بس قبلها لازم تعرف ليش أندية البريميرليغ ممكن تصرف مليارات وهم تبقى مرتاحة ماديا وما متجاوزة اللعب المالي النظيف.

• أندية البريميرليغ تستلم حصة بمتوسط 350 مليون كل موسم منها فقط 17% من إيرادات البث التلفزيوني ، وهاي الحصة متقاربة من سندرلاند لحد ليفربول والفريق الفايز بالدوري يحصلله حوافز زايدة بس مو ذاك الفرق عن المركز 20 مثلا. نظام اللعب المالي النظيف مال البريميرليغ عبارة عن بعد نهاية الموسم يحسبولك أنت وية ال350 النطيناها الك والحوافز الممكنة حسب مركزك والمن تأهلت وارباحك سواء من القمصان لو من البيع هل نزلت خسائرك عن الـ105 مليون باوند؟ إذا صارت بنهاية الموسم مجرد مالك النادي يقدمله ضمان مالي وهاهية فضت راحت ويخصمولك من الحساب مثلا صرفك على الأكاديمية وكم شغلة ثانية
  وطبعا اكو تسامح بالموضوع ، يحسبولك ايراداتك وخسائرك على مدار 3 مواسم وبنهاية كل موسم مو قبل بدايته وإذا يجيك مبلغ من مستثمر لو من ملاك النادي هم يحسبولك أرباح. بين قوسين البريميرليغ ديكلك اصرف وطور سواء أنت من كبار الدوري لو صاعد جديد واني اغطيلك ، يا رجل إذا تجيني من البلاي اوفس مال التشامبيونشب اني مقدما ناطيك 200 مليون يورو وتونس بيهن واصرف حالك حال غيرك. خالفت؟ اخصم شوية من نقاطك لو اغرمك وهاهية فضت راحت يا بطل. بالمجمل ايرادات البريميرليغ 7.1 مليار يورو حتتوزع على الأندية ومن ايراداتك مسموحلك تخسر 85%
• نجي على نظام الليغا الصارم جدا مقارنة بالبريميرليغ وحتى بالويفا ويسموه حرفيا بالتحكم الإقتصادي ، الليغا شكد تربح كل موسم؟ 3.8 مليار يورو تقريبا. الأندية شكد متوسط ربحها كل موسم؟ 190 مليون يورو يعني تقريبا نص ربح أندية البريميرليغ وها اكو فارق جبير بين أندية التوب ومتذيلين الدوري. فوك هاي الفجوات بالمفاضلة بين الأندية تعال يالنادي الإسباني البطل انت قبل كل موسم اني اجي احسبلك شكد حققت أرباح؟ عندك قيمة صرف محدودة وعندك حد رواتب معين للاعبيك وإذا ردت تصرف لازم مباشرة تبيع لو تعير لاعبيك وإذا عندك مستثمر خارجي وانطاك فلوس ما محسوبتلك ذني.
  عندك حد صرف 70% من إيراداتك للموسم الفات على الرواتب وعلى التعاقدات وينحسب صرفك على كل المستويات سواء بالاكاديمية لو بالرديف لو بالفريق النسائي وحتى بكرة السلة إذا عندك نادي هناك محسوب صرفك عليه .. راح احاسبك قبل كل موسم وإذا خالفت ممنوع تسجل لاعبيك أصلا حتى تبيعلك كم لاعب حتى لو هذا على حساب سكوادك وحتى لو هالنظام ظالم للأندية الأصغر بالدوري وبحجة حتى اضمنلك ما تخسر ارباحك بسبب صرفك
  وبسبب هذا النظام آخر سنين جنت تشوف إشبيلية وفياريال وسوسيداد وبلباو وجيرونا وحتى برشلونة الي هو المفروض نادي ناجح رياضيا وعنده قاعدة جماهيرية وارباح مرعبة وغيرهم يشاركون بالأبطال لو يفوزون باليوروبا ليغ وتاليها يخسرون نجوم كبار للدوري أو مواهب مميزة مثل راموس ميسي ايزاك سورلوث دوفبيك النصيري انيغو مارتينيز برايان خيل بنزيما جواو فيليكس ميرينو زوبيمندي ديمبلي بيدرو بورو بايجيتيتش كوكوريلا رودري سافيو نيكو غونزاليس باو توريس موراتا اوباميانغ ..
  وغيرهم هواااااي نجوم يطلعون من الليغا لدوريات ثانية فقط لأن ناديه ما يكدر يتحمل وجوده بسبب قوانين إقتصادية صارمة وتخلق تفاوت بالأندية وتحد صرفهم بعز تزايد الأسعار بكرة القدم حاليا وناديهم يخليهم يروحون أما مجانا أو بسعر زهيد
  باختصار البريميرليغ راح ينطيك ربح عالي ويكلك حدك تصرفلي منه 85% واحاسبك ورة 3 مواسم ، الليغا نص هذا الربح وقبل كل موسم تحاسبك تكلك تحصل فلوس يلا اسمحلك تتعاقد وصرفك من ايراداتك 70% بس
  تيباس من مشروع الCVC وقوانين اللعب المالي النظيف مالته ديدمر الليغا وديحط حد لنجاح وتنافسية أنديته وديجبر حتى النادي الينجح رياضيا يغير فريقه وسكواده ويبيعهم بسعر زهيد حتى بس يكدر يسجل لاعبيه كل موسم وحتى توصل أن يخسر مدربين ممتازين يرفعون من جودة الفريق .. والك مثال بجيرونا وفياريال واشبيلية ، نافسولهم فترة بسكواد جيد تاليها خسروا نجومهم وتدريجيا دينزلون بالترتيب ، والمشكلة فوك كل هذا صار رئيس اتحاد إسبانيا من ترك رئاسة الليغا !