ماذا تعرف عن سيرة الشهيد زغلول

عمارنة سهام

الشهيد الرائد ​سي زغلول.. أسد بني شقران ونجم الحمري
​ولد الدوار اللي كبر في قلب وهران، الشهيد بن عدة بن عودة، المعرووف بـ “سي زغلول”. زاد في 12 فيفري 1927 بدوار العناترة، ولد أمحمد وفاطمة بلهادف. صغره ما كانش ساهل؛ وهو ابن ثلاث سنين، رفدته يماه وجات بيه لوهران وهي مريضة بالسل، وما طولتش مسكينة وتوفات في 1932. وكبر يتيم وكفله خاله مصطفى بن يسعد، داك المناضل الحر اللي شرب منه سي زغلول حب الوطن من الصغر. قرا القرآن الكريم في شريعة زاوية بن عودة بحي الحمري وكمل قرايته ، ونهار اللي اشتد عوده، رفع راسه وعول على ذراعه باش يجيب قوته.
​دارت الأيام، وفي 1945 بدا يتردد على مدرسة التربية والتعليم مع رجال الاتحاد الديمقراطي وعلماء الأمة. في أواخر 1948 دخل للجيش الفرنسي في المدفعية، ودوه للهند الصينية يقاتل في 1949. بصح قلب الولد كان معمر بحب أرضه. نهار اللي رجع في 1955 وشاف جمر الثورة شاعلة في بلاده، ما قدرش يصبر. وفي 12 مارس 1956، هرب هو ورجاله من مركز الصبابنة قرب بوست نتاع مغنية، والتحق بالخاوة في الجبل.
​من داك النهار، بدا اسم “سي زغلول” يرعب العدو:
​22 مارس 1956: تعين ملازم وقائد للعمليات العسكرية من ندرومة حتى لوهران.
​14 جوان 1956: قاد كمين محكم ضد فيلق فرنسا في منطقة مداغ بثلاث كتائب، وشارك في معركة سيدي غالم الشهيرة مع سي عبد المومن وسي جبلي.
​بعد مؤتمر الصومام: طلع ڨراد لملازم أول وقائد عسكري بالمنطقة الرابعة.
​11 فيفري 1959: تبليسا بجروح خطيرة في اشتباك نواحي عين تموشنت، وطاح في أيدين العدو. ذاق عذاب أليم، وحكموا عليه بالإعدام في ماي 1960.. بصح البطل ما يترماش بسهولة ، وفي 21 ديسمبر 1961، دار عملية فرار هبلت العقل الاستعمار من سجن “سان لو”.
​رجع للميدان برتبة “كوموندو” في الولاية الخامسة، وزاد شعلها عليهم في سيق، بني شقران، وادي ارهيو، وغليزان. بصح المكتوب كان يستنى فيه.. في 14 مارس 1962، أيام قليلة قبل الاستقلال، طاح سي زغلول في كمين غادر بفيرمة أولاد برخرخ بدوار أولاد عائشة (بلدية حمري).