حسين خالد
“فلورنتينو بيريز” ظلم ريال مدريد وظلم “كارلو أنشيلوتي”. اللي هو شخصياً سمح له يظلمه
تخيل انت بادئ الموسم يطير منك “ميليتاو” رباط صليبي .. ثم في نوفمبر يروح منك .. “الابا” لنفس الإصابة
عشان تبقى رسمياً داخل نص الموسم بقلبين دفاع فقط .. فكان الصح والطبيعي انك تعمل تدعيمات في يناير بمدافع واحد على الأقل
لكن ريال مدريد قرر يخاطر وكمل بدون تعاقدات … النتيجة هي ان كمان “روديجير” و”ناتشو” اتصابوا ! فط
الفريق رسمياً بدون قلب دفاع ! طبعاً “كارلو أنشيلوتي” اضطر للترقيع واستخدام “كارفخال” الظهير الأيمن و”تشواميني” كقلوب دفاع !
خليني اقولك ان الاتنين فاجؤني !
“كارفخال” أصلا عايش فورمة استثنائية الموسم ده .. اكتشفنا جوانب جديدة في بروفايله تمثلت في مرحلة البناء كقلب دفاع
عايز اقولك ان رغم قصر قامته .. “كارفخال” كسب كل الثنائيات أمام الأوكراني “أرتيم دوڤبيك” عملاق جيرونا !
“تشواميني” بقا اللي هو أكبر معضلة في اسكواد ريال مدريد .. وده لانه ببساطة مش قادر يتمدد ويتوسع زي باقي اللاعيبة
لا يزال “تشواميني” حتى اللحظة أحادي البعد لا يجيد سوي افساد هجمات الخصم وإعادة تدوير الكرة فقط
وسط ملعب ريال مدريد دايما محتاج ارتكازه يكون La pausa زي “توني كروس” أو لاعب Moderator يدير عمليات الحيازة بالكامل
وللأسف ده فوق قدرات “تشواميني” بمراحل .. لكن كقلب دفاع اتفاجئت .. اداءات مختلفة تماماً
الولد قدم مستوى كويس لأن هنا مش مطلوب منه نفس القدر من الدورانات والسلوك الاستكشافي
“تشواميني” حتى نهاية السيزون ممكن يبقى خيار مهم كمدافع وخيار اضطراري كلاعب وسط
بس عشان اكون صريح معاك .. “تشواميني” مش هيتطور عن كدا وصعب لاعب زيه يقوم بدور “كروس” كمدير للحيازة
أو دور النحلة اللي بيعمله “فالفيردي” او “كامافينجا” .. لا هو سريع زي “فالفيردي” ولا هو مرن زي “كامافينجا”
المهم ان الثنائية دي في قلب الدفاع قدمت مباراة استثنائية أمام الخصم المباشر وده حقيقي Overachieving في حد ذاته
