حسين كمال
أنا عندي كراش رهيب على إريك تن هاج
اللي متابعني من زمان عارف إن هو دا المدرب اللي أنا كنت عايزه و ذكرته بالإسم قبل تعيينه …..مش إعتباطا…لكن لايماني إن مانشستر يونايتد كان محتاج مدرب مدرس ….مش مدرب بطولات ….المدرس ممكن يبقي مدرب بطولة على فكرة عادي ….بس مدرب البطولات زي مورينيو و زيدان و غيرهم محتاجين فرق جاهزة و ينفذوا بيها تكتيكهم …..تين هاج تجلي من تجليات المدرسة الهولندية الشاملة بس بإسلوب عصري و واقعي أكثر …..الرجل بيعرف يدافع و بيعرف يلعب على المرتدة …..لكن المبادئ الأساسية واحدة…..ضغط عالي و محاولة البناء من الخلف ….المساك اللي ناحية الشمال لازم يكون أشول زي ما عمل مع لوك شو …..الظهيرين لازم يكونوا بيعرفوا يلعبوا كرة عشان بيستخدمهم في وسط الملعب ……تين هاج كمان زي ما قلت مدرس يعني بيطور اللعيبة …..مين يصدق إن بيساكا يتحول كدا و بالذات على الصعيد الهجومي؟ …..مين يصدق إن لوك شو يتطور تكتيكيا للدرجة دي؟
تن هاج كمان زي ما قلت عنده نزعة واقعية كدا بتغيب كثير عن المدرسة الهولندية ….يعني عنده قدر من المرونة في إنه يلعب مهاجم ٩ كلاسيكي يستخدمه في إنه يحجز و يقف على الكرة و يفك زنقات …..و في ماتش برشلونة رقص تشافي ترقيصت معلم بحركة إنه رجع فيجهورست يلعب رقم ١٠ و قدامه راشفورد مهاجم صريح …..و بيعجبني أوي إستخدامه لبرونو ناحية اليمين لإنه بيقدر يخلق زيادة عددية ناحية اليمين في الوضع الهجومي و رجله حلوة في الكروسات و بيضم لوسط الملعب يضيقه في الوضع الدفاعي
لسه طبعاً بدري للحكم على تجربة تن هاج ….بس الرجل دا بشوية دعم في الصفقات هيكسر الدنيا …..و طبعاً السنة دي الرجل شبه بينافس على الدوري و لو إن في اعتقادي صعب جدا جدا مش عشان حاجة غير إن الفريق ما عندوش لعيبة كفاية تسد لآخر الموسم
