شعر شامخ الشندويلى
فى السما ظهرت سحابة
عرضها عرض الرحابة
طولها طول بالك ياصابرة
بيضا لون قلب الغلابة
لون هدومهم البسيطة
لون طلوع الصبح يابا
لون صلاة الفجر حاضر
ربنا فوق كل غادر
لون الأمانى الدفينة
والصوارى والسفينة
لون صلاة الإستخارة
والأدان فوق المنارة
والدُعا والإستجابة
فى السما ظهرت سحابة
جاية للناس الفقيرة
والطاقية والضفيرة
أكل عيشهم المعاند
وحكاياتهم الكتيرة
نازلة بتبلل جبينهم
عمالة تطبطب عليهم
تضحك وتبص فْ عُيونهم
الناس الصابرة الأميرة
اللى جواهم طيابة
فى السما ظهرت سحابة
بيضا لون الجلابية
والبراءة الربانية
والحلاوة والعيدية
والفطيرة ع الصينية
ربنا رزّاق و قادر
يدّى عمال اليومية
اللى عرقها ماليها
غير دراعاتها ماليها
عرقها اللى يبنى دنيا،
ريحته أحلى م الكولونيا
وايامها بكرة حتفرح
وتغنى ع السمسمية
وتنسى حزن الربابة
فى السما ظهرت سحابة
كل عاشق قلبه أخضر
والكداب نهايته شين
سلعته حتبور وتخسر
صلوا ع المصطفى زين
عيش يومينك وانت عارف،
إنهم يادوب يومين
بعدها الميزان حيوزن
ونشوف الحقيقة فين
فى السما ظهرت سحابة
والمطر ملو الإيدين
جى بالخير الزيادة
اللى يملأ ألف عين
والبشاير الجميلة
اللى عارفة رايحة فين
رايحة تكرش الديابة
رايحة تمسح الكآبة
فى السما ظهرت سحابة
