باللهجة الجزائرية .. أخدم على روحك ودير دراهم: الراجل بلا دراهم تبغيه غير يماه!

ذهبية شريط

يا خويا، شحال سمعنا وقيلت علينا أمثال وحكم، بصح كاين واحد المقولة تاقع في الصميم وتلخص الواقع بلا تزويق ولا كذب: “أخدم على روحك ودير دراهم، الراجل بلا دراهم تبغيه غير يماه، واللي يقول العكس يكذب!”

مكاش لي ينكر بلي المال ماشي هو كلشي في الدنيا، وبلي كاين قيم روحية وإنسانية ما تشرهاش الملاير، بصح كي نجوا للصح، في زماننا هذا، الجيوب الفارغة تضيق حتى أوسع القلوب. الراجل بلا دراهم، بلا خدمة ولا مستقبل مبني على ساس صحيح، يلقى روحه في مهب الريح.

اليوم، الكلمة الطيبة وحدها ما توكلش الخبز، ولا تخلص الكرا، ولا تقضي الصوالح. الدنيا غدرت باللي ما وجدش روحه، والناس ولاو يحاسبوك على واش في جيبك ماشي على واش كاين في قلبك. كي تكون عندك دراهمك، تفرض احترامك، وتكون عزيز في دارك ومع الناس. أما إذا كنت طايح ومعدوم، فحتى الباب يتقفل في وجهك، وما يبقى ليك واقف بالصح وداير بيك غير ذيك المسكينة يماك، اللي تهز همك بالحلال وتدعي معاك ليل ونهار، بلا ما تخمم واش في جيبك ولا واش عندك.

واللي يقولك “الدراهم وسخ دنيا” ولا “المحبة تبني دار” بوحدها، غير كذب عليك وغالطك! الحب الحقيقي طبعاً كاين، بصح الجوع كي يدخل مع الباب، المحبة تطير من الشباك. شحال من علاقة ضاعت، وشحال من دار تخربت، والسبب الوحيد كان هو “الزوالي” اللي ما لقاش باش يواجه مصاعب الحياة.

إذن،فيق لعمرك يا العبد، وشمّر على ساعديك. اخرج للخدمة، اتعب، شق طريقك بالحلال، ودير مستقبلك ودراهمك بيدك. ماتستناش من الدنيا تعطيك بالساهل، ولا تتيق في الهدرة الفارغة. اخدم اليوم باش ترتاح غدوة، وتكون راجل روحه عزيزة، متهني في حياته، خاطر في هاد الزمان: الدراهم هما السلاح اللي تفتح بيه كل الأبواب المسدودة.