لا اريد أن اراك كعدو و لا كصديق
بعد سنوات من البحث في علم الاجتماع والتنمية البشرية و “كيف تكسب الأصدقاء وتجلط الأعداء”، توصل الفلاسفة تاع الفيسبوك إلى أخطر نظرية فلسفية عرفتها البشرية بعد نظرية النسبية لأينشتاين.
النظرية تقول: هناك عباد المستوى تاعهم طايح لدرجة أنك حتى كي تتخاصم معاهم، تحس روحك راك تهين في الخصومة نفسها!
زمان كنا نقولو “بيناتنا عداوة” ونفتخر. اليوم ولينا نقولو “ما يستاهلش حتى نعاديه”. تخيل توصل لواحد الدرجة من التفاهة حتى العدو يحشم يقول عليك عدوي!
هذا النوع من البشر هو نفسه اللي:
- يعلقلك على منشور “أول تعليق” وتحشم ترد عليه
- يبعثلك “سلام” في الخاص وبعدها يقولك “سلفلي 50 ألف”
- يشوفك في الشارع ويقولك “ما عرفتنيش؟ كنا نقراو كيف كيف في التحضيري”
- والكارثة الكبرى… يطلب منك الـ WiFi
هؤلاء لا يصلحون لا حباب، لا صحاب، لا أعداء، لا حتى “Vu” في الماسنجر. مكانهم الطبيعي هو قائمة البلوك، مع تفعيل خاصية “نسيان أنهم كانوا موجودين أصلاً”.
الخصومة يا سادة، كانت زمان شرف. عنترة بن شداد كان يفتخر بخصومه الفرسان. اليوم لو تتخاصم مع بعض الناس، عنترة نفسه يخرج من القبر ويقولك “يا ولدي طيحت بيها”.
لهذا قررت، وبصفتي مواطن صالح، أن أطبق مقولة الصورة بحذافيرها. سأضع لافتة كبيرة على جبهتي مكتوب عليها:
“مغلق للصيانة: لا صداقة، لا عداوة، حتى السلام لا”
وإذا سألك أحدهم: علاه ما تهدرش مع فلان؟ قول له بكل فخر:
“ما يليقش يكون بيني وبينو حتى خصومة… الخصومة خسارة فيه!”
هل عندك أنت أيضا واحد من هؤلاء في حياتك؟
إرسال التعليق