الأسير :- مراد أبو الرب
نيال الأسير الي بطلع اول واحد على الساحة ,,,
مش عشان بكون في حلويات أو تمور !!
لأ ,,,
أول شيء لأنه بكون قدر يتحمم اول واحد بالغرفة ,, لانه بعد العدد الي بيجي قبل صلاة العيد ساعة بتبلش الحركة في الغرفة ,,
واحد بجهز ملابسه و بحجز الحمام ,,
و الثاني بقول :
خليني قبلك أنا أسرع !!
والي تحمم قبل لينام ,, يعني مجهز حاله ,,
والي بعده ما نام و ضل طول الليل حامل صور ولاده وأبوه وأمه و بحكي معهم بس هم ما بردوا ,,
و بنرجع لصاحبنا الي طلع أول واحد على الساحة ,, أول ما بيوصل بيجلس بنص الساحة و ببلش تكبيرات العيد,,,
الله أكبر,, الله أكبر,,الله أكبر ولله الحمد ,, الله اكبر كبيرا و الحمد لله كثيرا ,, إن الحمد و النعمت لك و الملك لا شريك لك ,,, الله اكبر الله أكبر,,,
وهيك بكون استلم القيادة و بكون الماسترو لتكبيرات العيد ,,
وكل شب بيطلع بقعد حده ,,
وببلش حسب ما وصل ,,
الثالث ,,
و الرابع ,,
وعلى هيك لحد ما يكتمل العدد,,
طبعاً بكونوا في شباب مش جاهزين و بيطلعوا متأخرين ,,
وفي ناس ما بتطلع أصلاً على الصلاة ,,
بس في سجن عسقلان الكل بيطلع ,,
وبكونوا السجانين معبيين المردوان ممكن عشرين سجان و أكثر,,
وبعد ما بتخلص التكبيرات,,
بوقف الشب الي بدو يخطب و ينوي للصلاة بعد ما يقول :
يا شباب صلاة العيد ركعتين ؛ الركعة الأولى سبع تكبيرات و الركعة الثانية خمس تكبيرات و بعد ما يخلص صلاة ,,
بوقف في نص الساحة و ببلش بالخطبة ,,
وطبعاً,,
في شباب بضل قاعدة محلها ,,
وفي شباب بتغير مكانها ,,
و بتقعد على مقعد الحديد الي بالزاوية ,,
وفي ناس بتوقف لحد ما يخلص الخطيب ,,
وبعد الدعاء ,,
يا شباب على الداير الكل يوقف,,
يعني على شان الكل يقوم يسلم هيك قال الامام ,,
بوقف اول شب و بالعادة بكون أكبر واحد بالسن ,,
والي بدو يوقف حده بيسلم عليه ,,
و طبعاً,,
ما في بوس على الخد ,,
يعني
حضن ثلاث مرات ,,
و سلام بالأيد ,,
و بيحكي إن شاء الله العيد الجاي بنكون أحرار,,
ما بنحكي كل عام وانتم بخير !!
هيك تعودنا بالسجن ,,
وهيك بصير طابور ,,
وبكون الكل سلم ,,
بعدها ,,
بقوم شب وبوزع تمر ,,
وواحد تاني بكون حاملابريق القهوة وبصب قهوة للشباب ,,
شباب بتقعد على الكراسي ,,
و شباب بتكزدر بالساحة ,,
و بتذكروا الي روحوا والي رحلوا و بعدهم بالثلاجات ,,
أبو وعر كان يضل قاعد بالزاوية ومشعل سيجارته ,,
وناصر ابو حميد بكون لابس البنطلون البني و البلوزة السودا و الكشط ( الكشاط/الحزام) ,,
طبعاً الكشط مصنوع صناعة يدوية و لحية طويلة و بكزدر في المردوان ,,
بس العيد هاد ما كان بجسمه ,,
كان بروحه بين الشباب ,,
الله يرحم الشهداء و يفرج عنهم من الثلاجات ,,
و كمان وليد دقة ,,
وليد دقة مش معنى لانه عمل عملية في المستشفى ,,
و استأصلوا الرئة اليمنى ووضعه صعب بصراحة ,,
هيك بلغ السجان !!
الله يعافيك يا ابو ميلاد ,,
وترجع النا و لميلاد بخير ????????
وما بتصير الساعة السبعة,,
الا المردوان بنادي :
يلا يا شباب يعطيكم العافيه,,
و ببلشوا الشباب يرجعوا على الغرف ,,
والي بدو يكمل نوم ,,
والي بدو يحضر فطور بلحمة ,,
بس مش زي الي كنا نوكلها بالدار ,,
وناس بتبع تلفزيون فلسطين,,
على امل تشوف حدا من الأحباب,,
وهيك بكون العيد انتهى بس ما في حدا بعيد زي برا ,,
يعني ما في عيدية ,,
ووصل للأرحام ,,
يعني ما في زيارة خوات ,,
وما في فت مصاري ,,
وكمان ما في مصاري نعطي لان المصاري عنا بس أرقام,,
و بالاخير,,
حقك عليّ يا امي اذا ما قدرت أعيد عليكِ هذا العيد ,,
على أمل العيد الجاي إن شاء الله ,,
قلعة الشهيد عبد القادر ابو الفحم
سجن عسقلان المركزي
الكاتب الأسير مراد
