قصيدة “جبل المعاني” أجمل ما كتبت الشاعرة التونسية ، نجوى النوي
تعد قصيدة “جبل المعاني” أجمل ما كتبت الشاعرة التونسية المتميزة السيدة نجوى النوي ، رئيسة صالون السيليوم الثقافي بمدينة القصرين و التي كانت لها العديد من المشاركات في مختلف المهرجانات العربية و الدولية ، حيث تقول في هذه القصيدة الجميلة :
” جبل المعاني ”
الجبل و أوعاره
موش كيف الي يرقى
الجبل و أوعاره
يعمّر دياره …و يكشف أسراره
زي كيف عابر سبيل
وجايّه زيارة
موش كيف اليرقى
الجبل درجة بدرجة
فجوجه و خَرْجه…
سفحه و عَرْجه
كلّي يُختل و يَرجى…
تغيب الدّباره
لا تَعب لا ذاق مرْجة
فلمحة بصر تغيب الأمارة
موش كيف الي يرقى
الجبل و اوعارة
زي كيف عابر سبيل
وجايّه زيارة
كانك تبّاع امشي معاي
و شوف الثنايا
دواليب يا شينها جروف و حنايا
لا صدق لا احْكِمْ لاهي درايا …
بلا رادتك تدخل غريق الجفارة…
المهم انك توصل الغاية
سوى عَايْبة و الا حقارة
موش كيف الي يرقى
الجبل و اوعاره
زي كيف عابر سبيل
جايّه زياره
تعلّمت من وقتنا
شين الطبايع
و الحق ضايع
بين زيف وبهتان
و برشا خدايع
و ياسر فضايع
من زيفهم يا جبل تعبّت شكاره…
بين جوف القدر تعدّت سوايع الذل و الخزي
يعطوه كاره
موش كيف الي يرقى
الجبل و اوعاره
زي كيف عابر سبيل
جايّه زيارة
تعلّمت من رحلتي
ياسر محن
فكري اترهن
بين ناس خايبة
و ياسر عفن
مدروك مجروح بايت انئِنْ…. على سوس و كّر بدربي سكن
تعلّى تيّاره
زيف وخنَنْ
سكّر أزراره
لا مقدرة ولاهي شطاره
موش كيف الي يرقى
الجبل وأوعاره
زي كيف عابر سبيل
جايّه زيارة
فرفتت قلت نطلق عناني …
اني حر ماني
صوّال و انجول بين المعاني
سلاحي القلم
فكري حصاني
سَوّاحْ في البر
لا من رجاني
ربحي خسارة
جليت من مكاني
انفتّش على راحتي
فلّي توارى
موش كيف الي يرقى
الجبل و اوعاره
زي كيف عابر سبيل
جايّه زيارة
و هي القصيدة التي تضاف إلى جملة ما كتبت الشاعرة العربية ، الملقبة بسمراء الجنوب ، نجوى النوي التي دائما تنير الساحة الثقافية المحلية منها و العربية على السواء بما تكتب من شعر و من كلام موزون .
الطيب بونوة