كيف دمر هانسي فليك برشلونة ؟؟

باسم الصاوي

لا اعرف كم مرة كررت التأكيد أن “فليك” هو المشكلة فـ برشلونة.

هو اللي رفع سقف طموح الجماهير، وأقنع العالم أن فريقه من أقوى 5 فرق فـ العالم، ولكن لو بصيت بواقعية، هو مش من أفضل 10 تشكيلات فـ العالم..وهنا مبتكلمش ع الـ 11 اللي بيلعبوا..اللي فيهم 4-5 سوبر، والباقي..عادي..فبقى بيتحاسب على أنه فعلاً بيدرب واحد من أفضل 5 فرق!.

الحد الطبيعي لـ برشلونة الحالي هو اللي كان مع تشافي، فريق منافس محليًا، لكن لو الريال جامد ياخد منه الدوري، وبيعمل شوية قلق فـ أوروبا..بس الكل عارف أن هييجي ماتش يخسر..والجماهير بتدعي ميكونش بـ ريمونتادا أو بفضيحة.

لكن لأنه مُدرب عبقري، عمل من لا شيء..شيء كبير جدًا..وفريق يقلق..لكن لـكل حاجة حد متقدرش تتجاوزه..خصوصًا لو الـ 4-5 السوبر اللي فـ الفريق..واحد مش في مستواه، واحد عجز، واحد غاب عن 42% من مُباريات الموسم، وواحد اتصاب فـ اهم مرحلة.

هما مين أقوى 5 فرق فـ العالم دلوقتي؟..باريس، أرسنال، بايرن، وخليني أحطلك سيتي -مجدعة- وافترض أن برشلونة الخامس.

قارن بين تشكيل الفرق دي وبرشلونة وشوف مين أفضل، وبلاش تحط الدكة علشان أعصابك مش هتستحمل، طيب، هل فيران، كوبارسي، بالدي، إريك جارسيا، أولمو..يلعبوا أساسيين فـ الفرق دي؟..طيب هل آراوخو وراشفورد وبيرنال أو كاسادو وجيرارد مارتن، يبقوا أهم بدلاء؟..أظن أنت عارف الإجابة..فـ شكرًا هانزي فليك.