انشيلوتي النسخة الثانية

فابريزيو رومانو وكذا صحيفة أسبانية قالت أن (أربيلوا) هيتبع أسلوب أنشيلوتي.
تمام، أيه هو أسلوب أنشيلوتي؟..لأن أنشيلوتي مالوش مدرسة فـ الكورة أو في طريقة اللعب، وأكبر ميزة ليه أنه بيخلي النجوم مرتاحين..وده سبب إقالة ألونسو.
جزء من جماهير برشلونة شايف أن ريال مدريد فريق مالوش هوية، ولا طريقة لعب، وده حقيقي..وده السبب اللي هيخلي أي مُدرب جاي يطبق فكر مُعين فـ الكورة ينطرد بعد كام أسبوع، يعني لو أنت عايز كلوب أو توخيل أو أي حد من الناس دي، أبشرك من دلوقتي أنه هيفشل.
يعني لما تخش على اللعيبة الحالية وهتقولهم أحنا هنضغط بالشكل ده، وهنلعب تمرير قصير وأنت يا فلان هتتحرك بالشكل ده، والكلام ده، هيقولك وعلى أيه يا معلم، ما ترمي الطويلة لـ فينسيوس ولا مبابي، وهنجيب جون.
احنا واخدين كذا دوري أبطال بالطريقة دي.
ومين قالك أن مبابي ولا فينسيوس هيضغطوا ولا هيرجعوا يدافعوا اصلاً، فأنت بسم الله الرحمن الرحيم بادي اللعب من غير 2 فـ الضغط.
ولو كمُدرب جيت تكلم واحد فيهم هيقولك أصبر، أنا بوفر مجهودي علشان لما تديني الكورة أعرف أجري 60 متر أو يكون عندي طاقة أسبق الدفاع.
وهي دي ضريبة النجومية اللي خلت ريال مدريد هو ريال مدريد..فريق نجوم طول عمره..لكن المُرعب حاليًا، أن الوضع دلوقتي غير وضع 2014 و2017.
وقتها مثلاً، كان كريستيانو معفي من الأدوار الدفاعية، لكن كان في ناس تانية فـ الملعب قادرة تطبق الضغط وتشيل غيابه عن الجزء ده.
لكن دلوقتي، في كام لاعب فـ ريال مدريد بيعرف يضغط؟، طيب في كام مايسترو فـ الوسط هيخرج من تحت الضغط وهيلعب الكورة الطويلة صح؟.
هتقولي أيوه عايز أيه؟.
هقولك بكل بساطة عايزك تفهم الوضع بس، أنت خلقت فريق نجوم كل واحد عمده الـ أنا عالية، ومحدش عنده استعداد يضحي علشان حد، يعني مفيش بنزيما ولا دي ماريا ولا مودريتش ولا كروس..انت عندك طقم معلمين..وعلشان تغير الناس دي مستحيل، فالأسهل غير المُدرب وهات واحد مرتاحين معاه وربنا هييسر إن شاء الله.
والحل التاني جماهير الريال هتكون هي أول واحد معترض عليه -ومش هيحصل لأن بيريز مش هيعمله اصلاً-، وهو أنك تقلل الـ أنا فـ الفريق ببيع لعيبة وتجيب لعيبة تانية عندها القدرة ع التضحية.
فلو قولت لـ واحد مثلاً هنبيع فينسيوس وبيلينغهام مثلاً هيقولك أنت عبيط..ممكن يوافق ع الأول لكن هيرفض التاني..فالمُدرب مضطر يتعامل مع ده لأن عمره ما يكون اقوى من الأسامي دي.
حتى لو جبت زيدان اللي هو معروف بالشخصية و الكلام ده، مش هيقدر يعمل حاجة لأن كواليتي اللعيبة دلوقتي أقل بكتير من حقبته الأولى، خصوصًا فـ الدفاع والوسط..فزيدان نفسه هيفشل.
في حل تالت، إن بيريز يعرف أنه مضطر يصرف، آه الناس كلها عارفة ده إلا هو، يعني أنت محتاج مدافع أشول جنب هويسن، محتاج لاعب ارتكاز ولاعب محور 2 لعيبة كورة بكواليتي عالي جدًا لـ الافتكاك والبناء..ومحتاج تبيع فينسيوس ع الأقل وتجيب واحد تاني عنده كواليتي عالية وفـ نفس الوقت جاهز يضحي بدنيًا لـ الضغط والمساندة..والـ أنا عنده أقل.
ولحد ده ما يحصل..فـ لا جديد تحت الشمس، نفس الناس دي تقدر تاخد الأبطال نهاية الموسم والناس تشيد بيها والـ أنا تكبر أكتر والفريق يقع مع الوقت، والناس دي ممكن برضه تفشل..ويمشي المُدرب وخلاص.