بعض الحقائق بعيداً عن الكليشيهات، :
مبدأيا انا بحب فينيسيوس اكتر من امبابي، ودا طبيعي لان لحظاته مع ريال مدريد و ذكرياتي معاه اكتر
(١) مبابي بيتحرك نفس تحركات بنزيما، وبيغطي نفس الخريطة الحرارية بتاعته، بالميللي، شوفها في الكومنتات، امبابي بيربط عادي مع فيني وبيميل علي الطرف زي ما بنزيما كان بيميل عليه
(٢) الاهداف المتوقعة لـ فيني مع امبابي اعلي من المتوقعة لـ فيني مع بنزيما اخر سنتين.. مفاجأة مش كدا ( بصوت احمد حلمي في كدا رضا ) والفرص المحققة لـ فيني مع امبابي اعلي من فترة بنزيما، والفرص اللي اهدرها فينيسيوس مع امبابي اكتر من فترة بنزيما، ومعدل المساهمات تقريبا واحد في وجود الاتنين، لو انت شاكك ادخل اي موقع وشوف المعدل والارقام
(٣) من بداية موسم 24/25 لحد اللحظة، يعني في موسم وربع فقط، صنع امبابي 77 فرصة في الدوري فقط، منهم 23 لـ فيني لوحده، يعني 30% من فرص امبابي كانت لـ فيني، ودا اكبر معدل بين اي ثنائي في الدوريات الخمسة من بداية 24/25
(٤) معدل صناعة بنزيما للفرص في افضل مواسمه 21/22 كان 2.1 فرصة في المباراة، ومعدل صناعة امبابي للفرص في واحد من اقل مواسمه، الموسم الماضي يعني، كان 1.7 فرصة ، عارف ان بنزيما اكيد اعلي في الـ link up play لكن امبابي دا مش ضعيف ولا رجله مقطوعة في الكنترول والتمرير، وعارف ان مبابي عنده مشكلة في تحركاته ك مهاجم، لكن دا تأثيره بالسلب مقربش من فينيسوس نهائي، لان فيني كل مباراة بيتحط في مواقف تسجيل
(٥) مبابي لم يأثّر علي فيني تماما في معدل التهديف، اللي تأثر هو بيلينجهام، لأن الفارق الحقيقي بين بنزيما وامبابي هو قدرة بنزيما المهولة علي الربط مع الوسط، مبابي بيربط فقط مع الطرف الايسر ومعنزل عن خط الوسط، وعشان كدا قولتلك اكتر لاعب غير سعيد بصفقة امبابي هو بيلينجهام، مش فينيسيوس، موسم 23/24 كان استثناء في مسيرة فيني بسبب عدم وجود مهاجم اصلا
اخيراً، مشكلة فيني عند فيني لوحده، لأن ايا كان المهاجم، كان بالتبعية هيبقي النجم، هاري كين هيبقي هو النجم الأول برضو، فيني لو يخرّج امبابي من دماغه هيقدر يسجل ويتألق ويحس بهدوء عادي.. اي فريق ناجح لازم يكون فيه نجم اول ونجم ثاني، والنجم الاول دايما هو الـ clinical finsher بتاع الفريق، والنجم الثاني هو كمان مكانته وقيمته محفوظة ..
