محدش يقدر ينكر أبدًا إن محمد صلاح يمكن بيمر باسوأ فتراته الكروية من بداية الموسم ودا مترجم رقميًا طبعًا إن الراجل بعد حوالي 1/3 الموسم بيساهم بـ4 أهداف بس بتسجيل جولين وصنع جولين تانيين ودا لأسباب كتير منها إن اللاعب نفس بيعدي بفترة تراجع مستوى ويمكن تبدأ بداية مرحلته الأخيرة كلاعب عادي يعني.
آرني سلوت خد قرار إنه هيقعد محمد صلاح على الدكة في ماتشين على التوالي في دوري أبطال أوروبا ضد جالطة سراي وبعدين آينتراخت فرانكفورت، ولسوء حظ صلاح نفسه إن ليفربول كسر سلسلة نتايجه السلبية ضد فرانكفورت بفوز عريض كمان خلى أصابع الاتهام “السطحية” تتجه لفكرة إن هو سبب نكبات الريدز الموسم دا.
بحسب التقارير الصحفية إن محمد صلاح دخل في مشادة مع آرني سلوت بعد الماتش بسبب وجوده على الدكة ودا غلط طبعًا لأن صلاح خلاص بقا لعيب ناضج كفاية ونجم كبير إنه يقدر يكون عنده ثبات انفعالي في التعامل مع موقف زي دا.
لكن صلاح زود الطين بلة بعد ما قرر إنه يشيل إنه “لاعب من ليفربول” صفحاته الرسمية وبعدين شال صوره بتيشرت ليفربول، ودا طبعًا بدون شك تصرف غلط وصبياني من محمد صلاح مالوش أي مبرر بالنسبالي وميطلعش من لاعب بذكاء صلاح.
فإحنا كدا متفقين إن صلاح غلط “لو” كان دخل في مشادة مع سلوت فعلًا وغلط أكتر لما عمل رد الفعل دا على السوشيال ميديا، لكن اللي مش منطقي بقا بالنسبالي هو ردود أفعال اللي محسوبين كنجوم للدوري الإنجليزي خصوصًا من الإنجليز.
واحد زي بول سكولز طلع وصف محمد صلاح بإنه لاعب “قبيح” وإنه اسوأ لاعب تم وصفه بالأفضل، وقبلها جيمي كاراجار قال إن محمد صلاح بقا كتير لاعب عبء على ليفربول، وأخيرًا واين روني اللي قال إن محمد صلاح بيتعامل كنجم ومش عايز يرجع يدافع ولازم اللعيبة الكبار تدخل لأنه كدا عبء على الفريق.
الحقيقة إن الهجوم المبالغ فيه من اللاعبين الإنجليز على محمد صلاح بمجرد ما مستواه تراجع في 1/3 موسم بعد 7 مواسم هو رقم 1 في بريميرليج وإنهم بيحله دمه زي ما بيقولوا بالنسبالي مش شايف المشهد دا غير إنه حقد وعن*ص*رية كانت مدفونة جواهم.
محاولة إنكار البعض منهم بشكل مستمر جودة محمد صلاح ملهاش معنى بالنسبالي غيرهم إنه حقد إن اللعب دا عربي أفريقي في النهاية مش إنجليزي ولا أوروبي، وهم بقالهم 7 مواسم مستنين الفرصة دي وكل مرة كانوا بيحاولوا يعملوا الهجمة دي عليه لو قعد 4 ولا 5 ماتشات كان بيرجع بسرعة يرد عليهم.
محمد صلاح هو واحد من أفضل 3 لاعبين في تاريخ بريميرليج دا لا مجال في النقاش فيه من وجهة نظري على مستوى الاستمرارية والأرقام والتأثير وكل حاجة، والحقيقة إننا لو بنتكلم على فترة محمد صلاح في ليفربول فمفيش لعيب في رأيي على مدار المواسم دي كان عنده استمراريته في العالم كله مش إنجلترا بس.
محمد صلاح غلط زي ما قولنا، لكن الهجمة الشرسة اللي بتحصل عليه من اللاعبين الإنجليز دي عن*ص*ر*ية واضحة وضوح الشمس، لأن اللي هو حققه في بريميرليج ويمكن حتى على مستوى العالم مفيش لعيب عربي أفريقي قدر يعمله بنفس الاستمرارية والقوة دايمًا.
ملحوظة: الشخص اللي كاتب البوست عنده مشاكل كتير مع شخصية محمد صلاح ومواقفه ومش من دراويشه خالص وتحديدًا آخر سنتين وهنا كلامي مقتصر على فكرة الكورة وما يحيط بيها مش لشخصه، شكرًا
