الحادثة اللي قضت على مسيرة هازارد !!
في لقاء مصور كان ايدين هازارد بيحكي عن مسيرته وازاي انتقاله لريال مدريد كان حلم حياته لكن الامور ما كانتش زي ماهو عايز والسبب في ده تفصيلة صغيرة مش بس خلته يرحل من المرينجي .. لا نهت مسيرته تماما.
هازارد راح ريال مدريد في 2019 وفي اول موسم تعرض لاصابة في الانكل سافر بعدها يعمل عملية في امريكا، ولما رجع كان فترة الكوفيد والدنيا كلها في العزل والمفروض انه يعمل تأهيل لاصابته لكن طبعا مفيش كورة ومفيش تدريبات ومفيش اخصائي تأهيل .. يعمل ايه هازارد ؟!
هازارد استسهل وقرر يعمل تأهيل لنفسه وطبعا بما انه مش متخصص لما رجعت التدريبات وبدأ يشارك في الماتشات بدأ يحس ان في حاجة غلط ومن وقتها بيقول هازارد ان رجله ما بقتش زي الاول وده سبب اصابات كتير.
هازارد حمل نفسه المسئولية وقال انه اكبر خطأ في مسيرته انه كان لازم يصر ويطلب اخصائي تأهيل من النادي يمكن الامور كان تتحسن.
الغريب في القصة دي كلها هو ازاي ريال مدريد ساب اللاعب يعمل كده من غير اي اشراف حتى لو اونلاين او بالفيديو كول مثلا لان اكيد اللاعب مش دكتور متخصص والنتيجة شوفناها في الملعب !!!
تفاصيل صغيرة جدا ممكن تستسهلها لكن للاسف تغير حياتك كلها.
