تشابي الونسو بقاله اسبوع بس في ريال مدريد ، مجرد 7 ايام ، لكنه قدر يخلص فيهم امور كتير جدا ، مستناش حتي الاعلان الرسمي !
هويسين ده كان رايح انجلترا خلاص لان بيريز كان مستغلي تمن الشرط الجزائي بتاعه ، هويسين نفسه كان فاقد الامل لان ريال مدريد مكنش عايز يتحرك ناحيته !
المبهر ان في ظرف يومين بالظبط الونسو خلص حوار هويسين ، طلبه من بيريز و خلاه يدفع فلوسه فورا و النهاردة كان الكشف الطبي و التوقيع ، سيناريو ليني يورو متكررش تاني !
في ظرف 7 ايام فقط ، الونسو طلب مدافع و ظهير ايسر و لاعب وسط ، ريال مدريد استجاب بسرعه مهوله للطلبات دي ، هويسين وصل ، كاريراس بيخلصوا معاه ، الكلام اتفتح مع ستيلر ، بعدها الكلام هيتفتح مع مهاجم تارجت ، كل ده و الموسم لسة منتهاش اصلا !
بيريز قبل كدة لما كان ريال مدريد بيخرج بموسم صفري كان بيجيب صفقات علي مزاجه هو و الموضوع كان بيقلب بعشوائيه كبيره و المدرب اللي موجود يقول حاضر و نعم و ملوش انه يتدخل في حاجة !
المرة دي الوضع مختلف 180 درجه ، الونسو فرض طلباته علي بيريز و موافقش يبقي زي المدربين اللي بيقبلوا بالامر الواقع ، دي خطتي انا و شكلي التكتيكي انا و انا عارف محتاج مين و هوظفه ازاي ، انا اطلب و انت يا بيريز تدفع و تنفذ ، امر غير طبيعي في ريال مدريد !
يبقي تحدي الونسو الاخير هو ازاي هيتعامل مع النجوم ، فينيسيوس و مبابي و بيلينجهام ، مين صوته هيبقي اعلي و بيريز هيستجيب لانهي صوت فيهم ، الونسو لو نجح في التحدي ده بدون توابع هيبقي انجاز بالمعني الحرفي
