انجازات اللاعب الجزائري محمد لامين عمورة

محمد الامين عموره لاعب مكافح و جايبها من تحت اوي ، هو ابن وفاق سطيف الجزائري و بدأ رحلة احترافه في اوروبا في 2021
عمورة بدأ في فريق لوجانو في سويسرا اللي اشتروه ب مليون و نصف يورو تقريبا ، قدر يساهم معاهم ب 22 هدف في 66 مباراة
انتقل بعدها الي فريق رويال يونيون في بلجيكا السنة اللي فاتت و قدر يساهم معاهم ب 29 هدف في 45 مباراة
عشان تجيلوا فرصه ممتازة السنة دي و يجيلوا عرض من فولفسبورج الالماني و يشتروه ب 17 مليون يورو !
الجميل بقي ان عمورة قدر الاسبوع ده يسجل في بايرن ميونيخ هدفين اجمل من بعض ، واحد باليمين في البعيده و التاني ب شماله !
المبهر بقي ان عمورة في اول موسم لي في الدوري الالماني قدر يكون افضل لاعب في فولفسبورج و عامل اداء ممتاز حقيقي ، تعالي ابهرك ب ارقام عمورة !
= بدأ 15 مباراة
= سجل 8 اهداف ، هداف الفريق !
= صنع 6 اهداف ، اكتر لاعب صنع اهداف في الفريق !
= ساهم ب 14 هدف ، رابع اكتر لاعب في البوندسليجا بعد مرموش و هاري كين و فلوريان فيرتز !
= بيحمل الكرة عموديا لمسافة اكتر من 5 متر 3 مرات في كل مباراة ، التاني في البوندسليجا بعد مرموش !
= بيعمل تصرفات بالكرة بتتسبب في تسديدات لفريقه بواقع 3 مرات في كل مباراة ، التاني بعد مرموش !
= بيسترجع الكرة 5 مرات في كل مباراة ، اكتر مهاجم في الدوري كله !
= تالت اكتر لاعب في البوندسليجا بيساهم باهداف من اللعب المفتوح بعد مرموش و هاري كين !
= اول لاعب في تاريخ فولفسبورج يساهم ب 10 اهداف في اول 11 مباراة في البوندسليجا !
المميز في عمورة انه عامل زي الفري الكترون ، بيقدر يلعب مهاجم و تحت المهاجم و جناح ايسر و جناح ايمن و بينتج كمان من كل ممرات الملعب !
كمان تحركاته للمساحات مذهله و في غايه الذكاء ، عنده تسارع عالي اوي سواء بالكرة او بدون الكرة ، بيقدر يوصل لاقصي سرعه في فتره زمنيه قليله جدا !
محمد الامين عمورة ، فخر الجزائر في اوروبا