مصر الرقمية بتسلم عليك
ضاع منى جواز السفر ، الباسبورت يعنى ، رحت السفارة علشان اعمل جواز جديد ، قالوا سهلة ، اعمل مذكرة فقد، فى قسم الشرطة وترجمها ووثقها فى الخارجية وهاتها .
جميل ،، رحت القسم وعملت مذكرة فقد على ورقة جميلة ملونة وفرحت قوى ، وخذتها وطرت على مكتب ترجمة معتمد وترجمتها ودبسوها فى المذكرة وطلعت على الخارجية اوثقها ، قالوا لا ، دى تترجمها فى وزارة العدل . وتصدق عليها من الخارجية .
روحت وزارة العدل ، قالوا لا دى تترجمها فى فى محكمة شمال القاهرة .
روحت محكمة شمال القاهرة الدور الثامن اترجم الورقة ، طبعا الخط مش واضح ومسؤلية الترجمة صح او غلط عليا ، ترجمنا الورقة ودفعت فضلة خيرك،،، مئتان جنية فى الشباك ، خلاص لا لسه ؟
تدفع 15 جنيه فى خزنة الدور الارضى مش مشكله ، روحت الخزنة قالوا لا تراجع الاول ، يعنى ايه ؟ يعنى تراجع الرسم فى المبنى القديم ، طلعت من الصف وروحت اراجع الرسوم.
سددت الرسوم والحمد لله واستلمت الشهادة وفرحت جدا ، قالو اختم فى الدور الرابع ، رحت اختم وختمت ، عرضا قالى الى ماسك الختم انت هتوثقها فى الخارجية ؟ قلت له اه ، قالى لا لازم تدفع اربعين جنيه فى خزنة ، وجنيهان فى خزنة تانية وتختم تانى وتأشر من المستشار فى الدور الثالث فى المحكمة القديمة ، الحمد لله عملت كل ده وخدت الشهادة .
وانا ماشى لاقيت ست بتعيط تقريبا سودانية بتعيطى ليه يا حاجة انتى مش خلصتى الترجمة ، انا كنت شايفك فوق فى الدور الثامن معايا من ساعتان ، قالت لا يابنى انا بدرو على مراجعة الرسم مش لاقية وخرجت بره المحكمة وسالت فى المصالح الحكومية جنب المحكمة اراجع فين وازاى محدش عارف .
ياحاجة ايه الى خرجك ؟ المراجعة هنا بس فى المحكمة القديمة وخدتها من ايدها وراجعت لها الورق وقلت لها تروح تسدد ، وبعدين تطلع فوق .
خرجت من المحكمة فرحان قالت اروح على الخارجية اصدق على التوقيعات الدنيا كانت زحمة ، واليوم خلص ،، على رأى حزمبل فى فيلم صغيرة على الحب لسعاد حسنى .
روحت تانى يوم على الخارجية من بدرى علشان اصدق على الورق بص ليا الموظف بقرف وقال لا ،، لازم توقع الورقة من مديرية الامن فى جنوب ، وبعدين تختم من كلية الشرطة فى العباسية .
وبما أنى راجل قديم ومش محدث معلوماتى روحت مديرية الامن فى وسط البلد ، اتاريها اتنقلت للتجمع الخامس ، مشيت ورا الجى بى اس وصلت بعد ساعتين ، ختمت الختم الاول وعلى كلية الشرطة فى العباسية ختم معالى نائب الوزير ، ومخالفة واقف فى الممنوع مائة جنية ، كله يهون ، قلت اروح بقى اصدق فى الخارجية ، كان اليوم خلص .
ثالث يوم ياسادة ياكرام رحت الخارجية اصدق بقا ، كل حاجة فلة وقفت فى الشباك قدمت الورق دفعت الفلوس ، براجع الورق ، ده ختم على ورقة واحدة الموظف ، والمفروض يختم الاثنين المذكرة والترجمة ، رجعت له ، قال وبراءة الاطفال فى عينية هو انت عاوز تختم الاثنين ؟ قلت له طبعا ، حاضر ياسيدى هات مائة وعشرة كمان .
دفعت وصدقت على الورق وختمت الخارجية ، وخرجت بعد مجهود ثلاث ايام ، جبت مصر من شرقها لغربها مائة اثنين وثلاثين كيلو على العداد والعداد مبيكدبش ، وانا مروح كنت باسمع الراديو ، حوار عن مؤتمر جميل لمصر الرقمية يعقد الان ، وان مصر حققت انجازات ضخمة فى هذا الاطار، واغلب التعاملات تغيرت من ورقية الى رقمية وانت قاعد فى البيت ، تاخد ورقك.
وانا اسمع وابص للورق الى لسه مخلصه وحاطه على الكرسى الى جنبى ، اسمع وابص تانى للورق الى جنبى ، وخايف الورق الى جنبى ينط فى كرشى ويقول يا كذاب ، ولا المذيع بتاع الراديو يقول لى طبعا # مصر ـ الرقمية ـ غصب عنك وعن امثالك الحاقدين.
…