المطلوب من اللاعب هازارد

اشرف

هازارد لازم يساعد نفسه ويتعلم من لاعب مثل أسينسيو
كان محطوط عليه حطة سوداء في بداية الموسم علشان مكانش عاوز يجدد ومعملش حاجة غير إجتهد وإتدرب وكل مرة يلعب يستغل الفرصة لحد ماريال نفسه بدأ يتفاوض معاه علشان التجديد
كلام هازارد إنه جاهز وأنشيلوتي هو اللي مضطهده ومش بلعب في مكاني مش هيأكل عيش خصوصا وإن أنشيلوتي شغله واضح وطور فالفيردي وفينسيوس ورودريجو وبيكسب وعارف يتصرف فأي إنتقاد لأنشيلوتي ملوش معنى
هازارد اصلا لازم يبقى جاهز حتى لو ملعبش علشان يبقى جاهز لكأس العالم علشان يثبت نفسه هناك ويضمن يإما يقعد مع ريال بمستواه في المونديال أو يلاقي فريق كبير يقتنع بيه
ملحوظة مهمة جدا …اللعب مع المنتخبات مختلف وجاهزية اللعب للمنتخبات مختلف وبيعتمد أكثر على الروح وحب المجموعة لبعض
زيدان في 2006 مع ريال كان منتهي لكن في المونديال لما حط لنفسه هدف شفنا أعظم نسخة منه
هازارد لازم يحط الامثلة ده قدامه علشان الناس اللي لسه بتحبه ومؤمنه بيه يرفع رأسهم
ملحوظة …ناس كتير فاكرة إني مش بحب هازارد لما توقعت فشله مع ريال لكن انا فعلا بحب موهبته بس علشان كنت عارف الضغط اللي فيه اللعب لريال وإنك تكون نجم منتظر وعارف البدني بتاع هازارد عامل إزاي فكنت متوقع الفشل ده بس بصراحة مكنتش اتوقع الفشل هيبقى بهذه الطريقة