عَوْدِي .. جَايْ!
عَوْدِي .. رَاجَعْ!
عَوْدِي .. غَادِي!
عَوْدِي .. يَتْشَايَعْ!
شُوفُو: عَوْدِي نَازَلْ،
بْحَالْ .. الصْخَرْ!
مِنْ فُوقْ لَجْبَلْ،
جَابْتُو لْحَمْلَة وَ تْلَاحْ ..
خُوكُمْ أَ لَبْنَاتْ!
حَطِّيتْ .. لَقْلُمْ،
وْ جِيتْ نَسْتَرَاحْ ..
وَاهْيَا .. لُولَادْ،
دَكُّو .. لُوتَادْ،
تَمَّا حُطُّو لَخْزَانَة!
فُوقْ ضَايَة لْوَادْ،
زِيدْ بَرَّحْ أَ لْبَرَّاحْ ..
بَلَّارَجْ .. وَ بْياضُو!
هَانِي جِيتْ عْلَى لْغَفْلَة،
عْيُونْ لَمْحَبَّة .. فَاضُو!
تْلَقَّايْ لِيَّا أَ لْفَحْلَة؛
طْفِي نَارْ لَجْرَاحْ ..
هَانِي جِيتَكْ؛
حِيتْ قْلَيْبِي .. حَنْ!
هَانِي جِيتَكْ؛
بِيتْ غْزَالِي .. وْطَنْ!
أَوَاهْ .. أَوَاهْ!
لَالَّة رَاحَةْ لَرْوَاحْ ..
غَسْلِينِي .. نَشْفِينِي،
عَنْقِينِي .. بُوسِينِي،
دَفِّينِي .. بِالسَّالَفْ غَطِّينِي،
زِينَكَ أَ لَالَّة طَيَّاحْ ..
لَوَاهْ أَ لْكَاوْيَانِي،
تْوَحَّشْتَكْ .. بَزَّافْ!
وَ اللِّي مَا جَرَّبْ،
كَمَا سْمَعْ .. مَا شَافْ!
خَابْرِينِي أَ ضَيْ عِينِي،
كْتَافْ .. عْلَى لَكْتَافْ!
أنَا وَيَّاكْ حْتَا لَصْبَاحْ ..
لَّا .. وَالُو!
وَحْدَكْ نْتِي يَا لَالَّة!
اللِّي تْنَسِّينِي فِي لْمُكَحْلَة،
زِينَكْ فَاسِي و لَشْفَارْ مْكَحْلَة،
حَمْرَا خْدُودْ التَّفَّاحْ ..
نِيفَكْ قَمْحَة .. فِّيمَكْ خَاتَمْ،
قَادَّة بَنْهُودَكْ .. سَخَّنْتِي الدَّمْ،
هَا شَرْبِيلْ الصَّمْ،
هَانِي الرَّاكَبْ .. فُوقْ لَدْهَمْ!
وَا هِيوْ ؛ قَرْقْبُو لَقْدَاحْ ..
كَايْ .. قْطُرْ!
كَايْ .. سِيلْ!
لْسَانَكْ يَا لَالَّة:
حْلَى مِنْ لْكَرَامِيلْ!
هَانْتِي ذُوقِي .. هَانْتِي شُوفِي:
لَاثَارْ دْيَالْ لْكَرَابِيلْ،
ضُرْبِي الرَّشْ: سْوَارَتْ الرْبَاحْ ..
تْوَالْ لْهِيهْ .. حَصَّلْنَا لْغَدَّارْ،
حْسَابْ سَاعَة: أَدَّبْنَا لَهْبِيلْ،
كَرَّطْ لَحْيتُو .. نَاوِي يَهْرُبْ!
فِي نْصَاصَاتْ اللِّيلْ،
هَا عَوْدِي أَنَا: عْرِيسْ لْخِيلْ!
هَيْجُوهْ الرْمَى بَقْصَايَدْ لْمَدَّاحْ..
أَوَاهْ .. أَوَاهْ!
كُلْهَا يَلْغِي .. بَلْغَاهْ؛
حَلْق لْعَيْطَة سَارْ يَعَاوَدْ،
هَا الدَّقْ .. صْحِيحْ؛
لْبَارُودْ فِي لَمْزَاوَدْ!
عَمَّرْ .. يَا لْعُمَّارْ؛
دْوِيدَة وَ بَنْدَاوَدْ!
سَرْج النَّخْوَة: لْخَيَّالَة لَمْلَاحْ ..
وَيَا لَالَّة: مَا قْتَلْنَا دْرَارِي،
حَركَتْنَا نْقِيَّة مَنْصُورَة!
يَا لَالَّة: مَا قْطَعْنَا شْجَرْ،
شَدِّينَا لْغَدَّارْ فِي الدُّورَة!
يَا لَالَّة: مَا سْبِينَا وْلِيَّاتْ،
سَدِّينَا عْلِيهْ فِي النْغُورَة!
يَا لَالَّة: خْدِينَا لْغَلَّة،
كانْ خَازَنْهَا فِي لْمَطْمُورَة!
اللهْ اللهْ مُولَانَا الفَتَّاحْ ..
وَاجِيتَكْ يَا لَالَّة!
فَرْفَرْ الطِّيرْ .. رْجَعْ لْعُشُّو،
هَانِي نَزْرَعْ لْخِيرْ،
هَا النَّاسْ .. كَا تْحُشُّو!
عَيْشَكْ أَ لَالَّة؛
لَغْدَرْ صْعِيبْ .. مُولَاهْ نْفَرْشُو!
نَفْسِي رَاضْيَة، وَ اللهُ أكْبَرْ؛
لَكْفَنْ بْيَضْ .. مَانِيشْ نْغَشُّو!
وَرْد، رِيحانْ، مَسْك و عَنْبَرْ،
رُشُّو قَبْرِي .. زِيدُو رُشُّو!
فْجَرْ لْحَالْ نُورُو وَضَّاحْ ..
هَلَّلْ .. لْهَلَّالْ،
جْوَابْ .. السُّؤَالْ،
أَنَا و لَالَّة: صْلَاتْنَا بِالتَّسْبِيحْ!
سْجَدْ أَ لَعْقَلْ؛
لَا تْطَوَّلْ فِي التَّوْضيحْ!
لْعِيشَة لْهَانْيَة؛
أَنَا و لَالَّة: فُوقْ التَّسْرِيحْ!
رْوِيهَا يَا كَرِيمْ؛
هِيّا تَتْمَنَّا .. أَنَا نَتْسَنَّا،
و الجَّايَّة: حَرْكَةْ النْطِيحْ!
هَا لَقْرُونْ صْحَاحْ ..
عبد المجيد موميروس
