ثقافة

موسوعة الشعر الملحون الجزائر … قصيدة قاضي الحب

 

جيتك رافع دعوتي يا قاضي الحب…وتغيث المضيوم داخل تحت حماك
لاتغبن مظلوم يتجلى هارب………..جار عليه الحب مثلي وتعناك
عيني شافت ريم كي طاح لمغرب..كيما شفتو شافني مانيشي شاك
بالومية نابيتلو الي واجب…………….كي كلمتو قالي فاهم معناك
ناباني بالعين وبشارة تعجب…………قال تنكب حاذر الحساد وراك
وهمنا ذالناس بالسربة تعقب…….وتلاقيت بشوفتي ساعة من ذاك
عدت نجيب كلام ماهوش مصاوب……مقواني قدام باشا من لتراك
اعرفني مخلوع منو مترهب………..كلمتو بعض الكلام وقال ادزاك
انظرني بعيون قتالة تعطب……….راه مقلق ما جبرت معاه سلاك
جات الضلمة بينا والحال غصب……هو راح سليم وانا زدت هلاك
هذا ماقالي ع الصح مرتب……شوف جواب خليلتي واعمل مرضاك
اعدل فيمل بينا دير الواجب…………اذا ربيت القايمة ربي يرعاك
قال لها واعلاش يا كحل الحاجب…..اتواسيلو هكذا خافي مولاك
قالتلو مجنون يصحى ويغيب……….لا تديلو راي بالباطل شكاك
صدت لي قاتلي مالك تكذب….ياك انا في الشاو مانعرفش سماك
مانقدرش نقول ذاك الفم كذب………لكن عدينا ليالي نا وياك
عندي شاهد ما يزيف ما يكذب…..هذ القلب لي مكوي بيه جفاك
تدلل بكلام عني وتمقيب…………قالتلي من يعرفك هذي تهماك
ولد الخيمة عيب عنو كان نسب…اذا غابت نسبتي سالي باباك
انديرو مابينا ربي راقب……………….اذا قلبك شين عنا يتولاك
مول القلب الزين عمرو ما ينكب….والي حاسد فارقو لوكان ضناك
انحس النيران في جوفي تلهب…..انا عقلي من فراقك زاد هلاك
يوم فراقك فيه عام اذا نحسب….ضروك دار الحول وانا نستناك
صاحب ظني قالي لا تتشغب….وسع بالك للزمان اذا عاداك
نجم النحس اذاطلع لابد يغرب…اذا بيك حبيب قلبك ماينساك
يادهري ظنيت مادرت الواجب…….لي مدة ناظرة عيني لقفاك
كنت نمثل خاطري طير يلولب….وين ختلتو راه لاح العين حذاك
كي كان المكتوب مامنو مهرب…نصبولو على زينة الشوفة لشراك
نجع المحنة حط في قلبي رحب…قداش ان دوار شبكها تشباك
من كثرة لهوال نصحى ونغيب……سكران بخمر المحبة دايم هاك
طول الليل نبات مفتون ملوب….ويوك يا ليل الهموم يبان ضياك
قالو لي في حب ولفك كانش طب….ماظنيت يفكني منها فكاك
قلبي والع بيك والحسنة تجلب…نبغي من تبغي وننكر من عاداك
لوكان المولى يجيب نهار صب…….وتمكن ضرباتها في لهلاك
ذاك الوقت ندير صدري للمشرب…ياولفي نديك ولانموت حذاك
راهم بعض الناس قالولي تتعب…..اتبع في شاردة ربي عياك
لو تتركها خيرلك ماتتعذب………اتغانى عنها وخلي من خلاك
ماينساكش خاطري ما يتجنب….اذا ينسى قيس ليلى ماننساك
يعرف قدر الحب من شاف وجرب…يعذرني ويقول راه الحق معاك
على الطفلة لي زينها فايق يعجب…اجميع الي صارلك منها مقواك
ضركا دارت بيك هي تتحاسب…..ويفكك في الاخرة منها مولاك.

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني.

إغلاق
إغلاق